寧波同鄉會

中環好多會所飯堂，但唔係間間話入就入，有D要係校友，有D要俾一千幾百入會，寧波就親民D，填張表，$100入會，就係一年會費，不過，食物價錢就唔係咁親民喇，變番一般會所飯堂價！好似我哋一行6大2細，晌星期六食個晏仔，就成$900，比起晌出面飲餐茶無疑就費咗成倍。話雖如此，既來之則安之，人生總要乜都試吓，況且，哩度靜靜焗，唔似茶樓又嘈嘈「貢」，有時候都要係靜靜心好好享受番一餐午飯。

既然係姨仔叫哩依度，梗係由佢發辦啦，先上個三色拼盤（有海蜇、燻魚、醉雞），小籠包，同推介嘅臭豆腐。拼盤做得有水準，海蜇感覺普通D，但燻魚燻得香口，有肉汁而唔太乾，醉雞好嫩滑，嚐到淡淡酒香，啱晒口味；小籠包OK嘅，皮薄，湯汁豐盈，做足基本；臭豆腐真係好耐無食過，今次仲要唔係掃街哩食，晌餐廳食，豆腐上枱時比預期中唔係咁大朕臭味，外型好大磚一舊，外皮炸得好鬆化，豆腐內依然嫩滑非常，所以一樣好食，但始終緬懷晌街邊聞到勁「臭」嘅臭豆腐！

食完前菜、點心同小食，配個酸辣湯，不過不失，材料及酸辣度足，唔餬口。跟住就係兩個小菜：黃金蝦、咕嚕肉，搭多個寧波炒飯作結。除了個黃金蝦夠晒惹味鹹香之外，另外兩個食完令人印象唔會深，好似個寧波炒飯，有D似平時食開嘅揚洲炒飯咁，當然材料應該有別（我就無特別去睇吓有咩分別），但感覺好似，所以就覺得佢無咩特別喇。