搬左去宜安街, 荃灣小巴站旁...咪去再試下羅...都ok呀...價錢同以前差唔多...

都坐得几舒服...如果知定, 都唔會好遠...最好就係新舖有電視...哈...正

上次哩得兩公婆食晏，凈係試咗個香茅豬扒湯濛同咖喱雞扒飯，今勻搵埋姨仔舅仔哩，人齊D可以試吓佢個拼盤喇！個拼盤上次猛咁推介，今次哩多少都因為佢，大大份有齊多款越南小食。小店，地方雖然係逼D，但價錢著實大眾化，所以有一定吸引力，好似今晚晚市哩依然坐到滿！

越想食拼盤

有香茅雞翼、蔗蝦、魚餅、春卷、炸魚卷、蒸粉卷、豬頸肉同扎肉，除豬頸肉，樣樣兩件，可惜無咗貴價嘅蝦餅，但份量上計落都抵食。雞翼甚有香茅味，脆煎零舍惹味，蒸粉卷外皮有米香，餡料又多，醮咗魚露特別好味；蔗蝦就削咗D，又無乜蔗香；其他幾款小食，可以以穩穩陣陣哩形容，如果加多三幾大蝦片，賣相仲有D睇頭呢？

火車頭

對「火車頭」都唔係好認識，屋企人話有番咁上下大大碗，加埋幾款牛肉，就已經算正宗喎，咁眼前哩碗都算合格啦。碗內嘅河粉確實幾多，餸料有生、熟牛肉，牛肉粒，竟然仲有D牛柏葉、蘿蔔添，雖則有幾款餸料，但整體份量上就唔多，味道一般！湯底方面，同上次哩嘅感覺差唔多，都做得唔錯，無靠味精！

炒牛肉撈濛

一個洋蔥炒牛肉加濛粉嘅簡單組合，不過，將牛肉、洋蔥、甘筍絲、椰菜絲撈勻一齊食，又幾好食，因為濛粉食起上哩好清爽，較濃味嘅洋蔥炒牛肉，搭上爽口嘅甘筍絲同椰菜絲，中和咗個油膩感，夏天食依個就正斗！

咖喱牛肉飯、炒菜

依兩樣嘢，都係為咗平衡番餐飯揀嘅。叫咗兩個粉粉濛濛，所以揀個飯，選擇又唔係好多，之前試過佢嘅咖喱，都覺得OK，所以再揀，舅仔話事就揀咗咖喱牛肉，又係牛肉，今餐真係食得牛多，味道無驚喜；多肉、多澱粉質，梗係叫番個炒菜，所以個菜為叫而叫！

上次寫食評俾個OK佢，今次再哩，都係維持原判，一樣都係得個OK，無辦法，雖然服務拉番唔少分，但食物質素又真係未見好突出！

端午節，又係一大班親戚走埋一齊食晚飯嘅日子，地點，親戚飯堂，因為大部份親友都係住晌深水埗同石硤尾，幫襯依間多彩都十幾年，好多時大時大節冬至、團年、姑媽生日飯都晌度食飯慶祝，雖然依家大家無以前住得咁集中，但今次端午都揀番哩度，因為對飯堂都有D感情，而且屬於屋村酒樓，價錢都算公道，而且，味道都OK。我哋大大細細成22人，開兩圍，俾咗個房我哋，食套餐嫌貴咗D，成$1,698-$2,698（12位用），仲未計加一，故此散叫抵食D，一共叫咗11個餸，加個荷葉飯，送生果盤，另酒水，茶芥，加一，兩圍夾埋$2,100唔使，仲有好多打包拎走，都算幾抵！

老實講，依個飯堂嘅食物質素只係不過不失，咁多年哩，都係維持住屋村酒樓嘅水平，無話特別搞咩花臣嘢吸引外圍客，專一做街坊生意，所以，多數都係大路小炒，無甚驚喜，食評方面，都覺得真係無咩值得好寫，好似我哋點嘅11個餸：白灼蝦、多彩一品燒雞、掛爐燒鴨、中式煎牛柳、菠蘿生炒骨、西芹彩椒炒龍躉球、日本鮑片鵝掌煲、金銀蛋浸莧菜、靈芝鮑扒菠菜、銀杏百合香芋炒藕片、木桶蝴蝶骨，都一樣係咁大路。

咦！咪住，臨尾依個「木桶蝴蝶骨」係咩哩？原先點嘅時候見佢同其他如牛仔骨、牛柳粒嘅菜擺埋一齊，一心諗住都係唔知豬或牛骨之類嘅小炒一碟，見個名幾得意，即管一試，哩到見到發覺完全估錯晒，個名好似好型，咩蝴蝶骨，查實就係木桶版嘅豬軟骨煲，真係唓一聲，雖然個名就玩嘢D，都無緊要嘅，個豬軟骨煲都幾好食，湯頭鮮甜，豬軟骨都幾脆！

另一搞嘢之作，就係個鮮蝦荷葉飯，材料、味道、飯粒都對辦，但份量就真係估佢唔到咁超巨型，比平時多數見到嘅荷葉飯差唔多一個頂兩個，多咗成倍咁滯，結果人人都試咗一碗仔之餘，仲可以打包咗成盒飯拎走，都咪話唔少嘢，嘻嘻！

完咗教會崇拜，我哋一行九個大人兩個細路，原先打算到又一村花園俱樂部中菜廳飲茶，點知座無虛席，外面頃盆大雨咁，退而求其次，唯有落下面嘅西餐廳Verbena Café啦，朋友話依度西餐都OK嘅，所以就一字排開大長枱，坐好睇餐牌準備叫嘢食。點知見對面枱一籠二籠有點心食，再問問侍應，哦，原來晌西餐廳都可以剔樓上中菜廳嘅點心，結果，我哋就晌西餐廳食點心！

因為人多坐長枱實在好唔方便，所以，剔點心時索性起孖兩邊頭尾都各款點心放一籠！點心紙唔算好多嘢食，叫OK啦，數數埋埋蒸、炸、腸粉連甜品都有四十幾款，價錢就由小點$13到特點$32，以一間中檔酒樓計都可接受。環境方面，由於係西餐廳，全是活動式木枱為主，方便組合不同大細長枱，裝修普通，啡色杏色為主調，配以布梳化椅，比起中菜廳燈光當然比較柔和，但嘈雜嘅人聲就跟中菜廳不惶多讓。而客路就大多數係附近又一村嘅有錢人，所以，見到侍應同大部份客都好熟，有傾有講，我哋依枱成枱生客又無話好冷待我哋，只係點到即止，唔會講多兩句啫。

點心

叫咗9款嘢：蠔皇叉燒包、薑蔥牛柏葉、沙律明蝦角、瑤柱珍珠雞、咖喱蒸魷魚、鮮竹牛肉球、羅漢齋腸粉、鮮竹鯪魚球、金粟墨魚餅，點心質素中規中矩，好食唔講得，好差又未算，就係平凡咗D。最好食嘅，我就覺得係個咖喱蒸魷魚，好入味，魷魚唔韌；最麻麻，首推沙律明蝦角，上到枱已經唔熱，醮點嘅都係普通嘅沙律醬，仲要係大點添！

粉麵

其實西餐廳本身個餐牌都幾多樣化，唔止西式食物，有湯粉麵，有唔同地方嘅嘢食，不過我哋就只係揀咗兩個炒粉飯麵：瑞士汁乾炒牛河、香蒜雞粒帶子炒飯。前者河粉同牛肉都炒得唔錯，河粉唔油，食完唔會一碟油晌碟底，牛肉軟腍，係個味似普通乾牛河，唔太覺有瑞士汁個種甜味，但整體都係好食嘅；而後者炒飯底未夠乾身，香蒜味亦都哩得弱，雞粒、帶子粒份量唔多，相比之下，哩個炒飯就差咗D喇！

茶芥

上面中菜廳同依度西餐廳都唔收加一，而茶芥依度就唔收，相信因為依度以西餐廳形式經營，無收茶芥哩回事，不過上面中菜廳就唔知收唔收，我估應該要啩！

又一村會所雖然話只招待會員，不過出出入入無限制，訂枱都可以唔使係會員，不過俾錢時就一定要個會員出現俾錢，如果無現身唔使旨意有得走，佢哋話點都要等到個會員哩埋單喎！事後問番，入會（個人會藉）要成$500,000喎，仲要年年交年費$750，都幾甘，就算買二手會藉我估都要二、三十萬啦！下次再去真係要睇真D個會所仲有D咩嘢設施提供俾會員先。但食嘢就未必再哩，因為又要麻煩人哩找數，位置比較吊腳，食物又唔係話特別好，價錢又唔算抵，環境無話係會所就靜局D，同出面嘅酒樓一樣「嘈嘈貢」，唯一係近教會啫！

老婆近排勁OT，連星期六都無埋要開工，所以趁星期六晏晝過哩帝苑買兩件餅，當請佢食下午茶，慰勞一下佢：

Sapporo Berries Cheese Cake $34

半球形賣相幾討好，其實依層係藍梅啫喱，做得好平滑，最上面放兩粒開心果仁，略嫌色較沉唔夠搶眼，同個藍梅啫喱唔襯。至於批開入面，分為三層，上層係芝士餡，中層係藍梅慕絲餡，底層係海綿清蛋糕。藍梅啫喱清甜得自然，而無葯水味嘅感覺；芝士餡較軟身，配合藍梅慕絲嘅柔滑，味道唔算好濃，但嗒出芝士香味；藍梅慕絲除咗柔滑，豐富嘅藍梅果酸味，帶出件餅嘅主題，甜度又適中，食多幾件都無問題！再者，一件餅用上唔同食材已經要分層哩做，加上獨立球形餅模相對花時間，真係唔止食味道，仲食出餅廚嘅心機！

Baileys Cheese Cake $32

外型又係做得一絕，唔怪得咁多人讚！橫睇掂睇都叫做四層，但細心慢食，我就覺得應該係五層，點解？當然唔係計埋個迷你法式甜餅（Macaroon）當一層啦！最上一層係一朕好薄好薄嘅百利甜酒漿，好似透明啫喱咁，凝在最上一層，要細心撩起至食到，好有趣，酒味不濃有陣陣糖漿嘅甜蜜；跟住下一層係忌廉芝士，夠實而不死，質感一流，好味；第三層係咖啡芝士，咖啡味醇香不俗套；第四層食極都覺得係朱古力蛋糕，不過就唔係海綿蛋糕喇，係屬於Brownie個類實凈型甜到死嘅蛋糕，由於佢忠於原註一樣甜到爆，所以唔太鍾意，太「漏」喇；最底一層係消化餅底，夾雜咗碎碎咖啡粒，頗有心思，又有牛油香，餅底都肯花心機哩做。講埋個Macaroon，唔止係裝飾，一樣好睇好食，外層一咬甚脆口鬆化，裡面嘅咖啡餡又幼滑如絲，雖然都明知係好甜好甜，但細細個易接受，所以做得細細都有佢道理！依款層次多變嘅蛋糕，深得我心，如果朱古力蛋糕層大減甜度，我就更加欣賞！

食朱古力會令人有種開心快樂嘅感覺，食甜品同樣會令人感到係一種重新得力嘅元素！

身為曼聯躉，晌曼聯廳餐睇波感覺好正，因為周圍都係曼聯名物，自然更加親切投入，如果有我偶像史特根嘅相，一定埋去影番張合照呀！是夜有幸得參另一食評網站搞嘅睇波活動，晌依度睇英格蘭 VS 斯洛文尼亞嘅直播，榮幸至極，入場費要$280一個人，唔平但有物有所值喎。雖然英格蘭唔係我最心水支持嘅國家隊，但情意結下都鍾意佢，所以盡撐英格蘭晌依場分組賽最尾一輪哩個絕地反擊，許勝不許和架！

先講個場，全場160個位座無虛席，甚有氣氛！

1. 環境一流，因為地方夠寬敞，唔會好似某些Bar/Pub咁，逼到插針都插唔入，遇有精彩閉門或撲救郁吓都難，晌依度就唔會，多咗空間感，起身點郁身郁勢都得，唔怕撞親人。

2. 視覺又一流，全場足有17部大電視，梗有一部係左近，無論你坐晌邊個位置，都可以盡情睇直播，唔怕錯過每個片段。再震撼D嘅，揀坐晌餐廳最尾，有部103吋Plasma超大電視，晝面一樣咁清晰，感覺就仲正，影住球員大頭時，感覺好似佢就係企晌你隔離咁呀！

3. 氣氛仲一流，因為全城齊撐英格蘭，同聲同氣自然夠晒氣勢，有進攻就齊齊叫「上呀！上呀！」，有閉門又齊齊叫「射呀！射呀！」，有射門但撻晒Q嘅就更加齊齊「妖妖」聲，講到有靚撲救或靚攻門，拍爛手掌啦，總之，令人好有投入感。

再講食，大會免費提供每人一份小食，兩杯嘢飲，我同個老友就揀咗脆炸洋蔥圈同炸魷魚圈。因為小弟唔好酒，雖眼見餐牌都有好多選擇，可惜未能一嚐，只好飲汽水啦！

1. 脆炸洋蔥圈 – 脆漿唔算厚，不過一般哩講，好多餐廳嘅炸洋蔥圈都好少失手，依度都係，以佐酒小食哩講，我幾鍾意炸洋蔥圈。反面點洋蔥圈嘅酸忌廉醬就做得幾正喎，唔係就咁一pat現成酸忌廉，內裡好似加咗D蔬菜粒同煙肉碎，唔係齋得個酸字，有層次。

2. 炸魷魚圈 – 感覺有少少橡筋，配隻甜酸醬，普普通通啦！

最後英格蘭小勝１：０，當然開心啦！

tried again yesterday~

good good again, i love the Subs!

好抵，酒店有這個價錢，超抵食！

一班舊朋友聚舊，R介紹哩依度，話係樓上café，梳化凳坐得舒服，有D位自成一角方便傾偈，又晌旺角個個人都就到，食物都OK，價錢亦都唔係貴，講到咁多優點，大家都覺得幾好都舉腳贊成！

哩到都幾私竇感，全部都梳化凳，佈置都好家居，書架放滿好多漫畫，有D棋、紙牌可以借哩玩，又有D得意擺設，好似IQ博士裡面嘅宇宙大王紙巾盒，人客唔太多，所以唔嘈，反而最嘈係我哋依枱人添，Sorry晒！

佢哋提供2款套餐，一個叫特色套餐（主菜為3款特定嘅飯或意粉），另一個叫自選套餐（主菜為一份焗肉配搭唔同嘅麵、粉或飯，如蕎麥麵、扭扭粉、茶漬飯），其實2者差唔多，都係一個主菜，加一杯嘢飲（可晌餐牌內揀任何一款$28嘅飲品），再配個小食或甜品（法式西多、紅豆雪糕杯、日式沙律或無添加雜菜湯），價錢由$60-$70，但平貴唔係你揀咩主菜喎，反而係取決於你揀咗咩小食或甜品，真係破格呀！我試咗個叉燒醬豬柳冷喬麥麵，個冷麵幾好，當然同高級日本餐廳比就唔公平啦，但佢都做得爽身，無話過腍，係件豬柳一般D，可能用咗叉燒醬整，食落似似哋舊叉燒；甜品，要咗雪糕紅豆杯，大大球雲喱拿雪糕（無得揀味道）加紅豆粒粒同少少朱古力脆米，驅走「濕立立」嘅悶氣；飲埋個茉莉甘枯檸檬抹茶，有個迎接夏天而又暑氣全消嘅感覺。

其他主菜方面，叉燒醬豬柳鮮茄湯扭扭意粉，朋友話普通咗D，因為個鮮茄湯味道淡咗D，鮮茄味唔係好夠，同我一樣，覺得豬柳似叉燒，哈哈！仲有試埋個煙鴨胸日式咖喱飯，睇樣幾唔錯喎，煙薰味夠出，鴨胸軟腍唔韌，鴨羶味亦唔算大，可惜，朋友都話食唔落，因為唔知點解個咖喱汁好鹹，鹹到要換過一碟，不過就無加咖喱汁喇，因為係個汁出問題！總結，位置方便，油麻地地鐵行一陣就到；地方幾好，環境令人覺得好輕鬆；服務友善，唔會因你坐得耐就成日問你仲加唔加嘢食呀，要杯嘢飲呀之類；食物一般，哩個環節差咗D，真係要改善吓！下次都會再哩，不過唔係為食嘢，係哩睇漫畫，hea番個晏晝！