讀者千奇不要光顧！！

中午見該店無人排隊便進去，但不久便覺得走進黑店！
這間所謂家庭式運作的店，簡直不知所謂！所以投訴都無用
樓面已經唔夠，廚房又做唔切，雖然已經有7個waiters但仍然一片混亂！
食完仲開始肚痛tim......!

服務態度5宗罪：

1. 無人得閒落單
舉手起碼5分鐘，7個侍應無一個肯望過來！

2. 女侍應唔識落單
落單個女人幾乎寫唔到單，只是2 個麵 + 2杯豆漿都要重覆左“3次”！

3.  落錯order 又唔肯換，要你硬食！
食物黎錯曬，個女人系要你要，然後馬上走開唔再理你！
我都已經開始激氣，唸左一陣都系啃唔落，冒險比人加料都要換番佢！

4.  男伙計鬧客屈人 ！（香港仲有d甘既服務態度？！火都黎！)
落錯我張單個女人唔理我，我咪同另一個男人講，佢開頭一樣唔肯理我，
但後來又死死地氣甘番轉頭來。不過，渠系番來鬧人，話：“你自己叫咩野都唔知
架咩?!” 然後發悔氣甘羅番碗野走！ 哇！！我超勁焗氣，我唔知自己叫mug點叫你換番呀叔！ 伙計做錯野仲要企圖兇客人！今時今日甘既服務態度簡直不知所謂，根本就系導遊阿珍的翻版！  逼人要d錯既野，你不如唔好比客點菜啦！黑店！

5.  女侍應又番轉頭話你
寫錯單個女人知道碗野換番，先肯番轉頭黎同我講野，”你下次講清楚d la!”
我吋番渠渠又好快甘飄走！阿姐，落錯單仲想賴人，落order時我地已經同你重覆講左“3”次要什麼，   真系激氣到爆！

班伙計系甘鬧客，根本就系飲食界的導遊阿珍，我唔知你地邉度人，但你地知唔知香港系講服務態度的地方？甘樣做生意，食物又唔算出色，雲吞麵得3粒雲吞已經要30幾蚊，又唔系好食，講同地區質素及衛生，北方餃子源好100陪！地道100陪！

各位唔想浪費金錢食差野又受氣，千奇唔好去試！
我都[b]一定無下次!!!!!!
 

本人光顧多次,相信除了老闆娘之外,其他人的服務態度認真需要很大改善.雖知道客户並不昰給你們出氣的.長此下去相信很快沒人光顧了.

食物質素尚可.但外賣竟然要收每個盒一蚊,醬料又要收一蚊,實在有借環保打劫之嫌

UCC個名好親切，因為小弟讀嘅中學英文縮寫都係叫UCC！好多時都好旺，除地理位置有利之外，以日式西餐廳計，佢價錢唔算貴，但主要賣點係加$28，主菜變套餐，有餐湯、有一次性嘅自助沙律、同一杯餐茶，計落真係非常之抵，符合晒攞著數嘅心態，好似我哋砌沙律手勢唔差嘅，雖然D沙律料好普通，無乜貴價嘢，但砌出哩個沙律咁大兜都唔止$28啦，個份量直情可以當一個女仔嘅正餐呀，最重要係過足個份「貪心」癮丫嘛，哈哈！

依餐生日飯，我哋一行2男3女，個個唔算大食，除咗小弟之外，所以叫4個主菜，另加錢2個轉套餐，夠晒食，連加一，埋單三舊半，每人都係$70，尖沙咀區算經濟化算，主要係食物質素都對辦，UCC嘅嘢一晌以哩水準都穩定，比較少出錯，依晚情況都係，質素保持到！至於服務同環境就，算中規中矩啦。

咖喱牛肉飯 $64
小弟唔嗜辣，所以帶微甜嘅日式咖喱就較啱我，4個主菜之中，其實依個最平平無奇，點佢都係純粹為咗食咖喱，別無他想。咖喱依樣濃香，微甜，層次唔複雜，對比印度、泰國等地咖喱，來得簡單一點，亦係另一種感受。牛肉，不期然將佢變咗做配角，唔難食已收貨，況且D牛肉都OK！

海鮮奄列飯（茄汁） $66
奄列飯，或者叫蛋包飯，都係晌日式西餐廳鍾意食嘅另一款菜式，因為可以睇到D師傅煎蛋 + 包飯嘅功力，今次個蛋皮厚度幾好，都幾夠薄，不過，我覺得晌三樓嘅Niji就稍為優勝少少，夠薄之餘仲要厚薄夠平均；另外，今次個奄列飯仲有個小瑕疵，面皮有少少穿咗，或許都係個意外啫。蛋皮包住海鮮炒飯，海鮮料就普通D，外層淋上蘑菇蕃茄汁，整體味道都OK！

魷魚本菇意大利燴飯 $64
有D驚喜喎，「烏卒卒」嘅意大利，因加咗墨魚汁，味道不再單調，加上飯粒濕潤煙韌，幾啱食。餸料有（本地）魷魚、（日本）本菇，前者柔韌啱啱好，係味道無乜，都好過個D橡筋魷魚，無味兼扯唔開，最怕呀；後者爽爽哋，令個意大利燴飯多咗另一種口感，而且，本菇好似有降膽固醇之效，真係多食唔怕！

海鮮湯意粉 $68
全晚最得眾人歡心嘅一道主菜，除了材料豐富之外，有青口、蝦、帶子、魷魚，其次就係湯底蕃茄味濃郁清新，蕃茄味夠實在唔假，而且，湯意粉一樣做到有咬口感，熟透度啱啱好。唯一要挑剔係個樣，上枱之時，你見佢D意粉放得雜亂無章，睇番就好似意粉、海鮮料、蕃茄湯放埋一齊煮，滚起就上碟咁款，如果連賣相都執好D，就起碼俾佢90分喇！

最後，大家都食得好飽，甜品留番下次先！
 

我地兩個人食佐四個點心一個飯, 全部都係散叫。收費就大概每人四十幾蚊, 同其他地方食LUNCH差唔多，不過D野食就有想像唔到咁好食。值得留意既係蝦餃、鮑片雞扎同豬潤腸。蝦餃就細粒少少, 一口一餃, 但佢D皮真係好薄, 而且透明有點點黏口果種感覺, 口感不錯; 鮑片雞扎, 則非常鮮味, 唔會太鹹, 而且非常足料, 有大大片冬菇同鮑片, 絕對沒有偷工減料, 我個舊同事仲要話唔係成日有得食, 睇來佢都係呢度既常客…; 最後仲有豬潤腸, 豬潤一口食落去就有較綿綿的感覺, 無"押"味, 仲有佢地既腸粉不是一般酒樓的腸粉, 應該係自製既粉皮, 好滑好香米味。睇來我個朋友就係無介紹錯, 等我下次再去試下先!

星期六收工，同老婆一齊食晏，揀咗K11哩個新場，因為哩搵食，所以無特別逛商場，K11都真係幾多食肆，幾多選擇，都睇咗幾間平平哋嘅，結果揀咗Misocool，原因有三，一係場旺，差唔多近兩點，見佢都仲係有八、九乘客，人氣反映出食物質素衰極有個譜，當然同佢位置可能有關，港鐵通道轉入K11，第一間鋪見就係佢喇；二係價錢，K11大部份都係食中、上價嘢多，佢就係少數比較平嘅食店，佢同一般拉麵專門店或日式西餐廳差唔多價位；三係想食，近排試咗好多唔同地方嘢，所以就想食吓日本嘢！

Misocool裝修都幾有型格，一室黃、綠間線配襯，木枱木凳，光猛有活力，侍應身穿卡奇色恤衫、斜褲配橙色腰帶，好有年輕感！不過，其實座位有D逼，尤其二人位，但還可接受；而侍應真係好唔夠，唔停咁忙哩樣忙個樣，所以揮幾次手佢哋都仲玩「睇我唔到」！題外話，幾鍾意佢個品牌公仔，一個疑似製味噌嘅瓦缸公仔（miso就係味噌，即係日本麵豉），兩隻手指指住自己，個樣有少少「得得戚」咁，旁邊加上一雙筷子夾起一炷麵，真係幾得意，設計者又幾有心思！

miso（味噌）日本代表性嘅調味料，cool（酷）年青人代表性意嘅識形態，撞埋一齊估佢係想表達傳統口味之中，有新派破格嘅態度啩！再一睇佢招牌，ramen（拉麵）、bento（便當）就係佢主打，打開餐牌，有拉麵、烏冬、冷麵、亦有丼同多款日式小食！

北海道帶子拉麵 $57
叫任何麵食或飯，加$20可轉為套餐，可以晌4款小食（麵豉湯、日式蒸蛋、芝麻醬豆腐、野菜沙律）揀2款，同埋多杯餐飲（但即磨咖啡只可以揀招牌咖啡），見轉套餐幾著數，所以個拉麵就轉咗套餐！
- 先上兩個小食，但份量好細，芝麻醬豆腐，係得一舊豆腐，而且唔滑，估計係雪得耐所致，幸好芝麻醬夠香，豆味又足，俾佢緊緊合格啦；野菜沙律，清新爽甜，簡單好食。
- 北海道帶子拉麵就要等得耐少少，不過個侍應都講過要等20min左右，依家15min就有，叫快咗！湯底都有得揀：九州豬骨湯、自家製蕃茄湯、北海道味噌湯、長崎地獄湯，我哋揀咗豬骨湯，所以，拉麵哩到睇到一湯奶白，呷一口豬骨味非常濃郁，雖然無相為証，但我就真係飲晒成碗湯，近乎一滴都無。帶子，睇相已經認住佢有6粒，哩到雖然沉在湯中，但摷番晒6粒足數無花假，而且粒粒飽滿，睇相粒帶子有半隻糖心蛋咁大，而且有晒裙邊唔係假嘢，味道鮮甜！講開糖心蛋，每客拉麵有半隻，糖心效果十足，非常好食，不過自己都蠢咗，早知唔叫餃子追加多隻糖心蛋好過（加$10）。至於拉麵都對板，柔中帶韌，又夠晒大碗，所以$57碗都食得過！
- 餐飲要招牌即磨咖啡，醇香幼滑，不過，唔知點解配上膠匙羮一隻，認真失禮，為一開脫就係佢哋認真唔夠人手囉！

燒三文魚飯糰配蕃茄牛肉湯 $47
- 燒三文魚飯糰，一客有3個飯糰，1個跟蕃茄牛肉湯同上，另外2個另碟上，食法隨意啦。既然有2個另上，我同老婆一人一個齋食，真係好得，飯糰夠結實，兩面煎香帶有微脆，最正係飯糰裡面藏有好多三文魚粒，咬落啖啖三文魚味！
- 蕃茄牛肉湯，蕃茄味夠濃，鹹味亦夠籠，係過晒籠個籠，好鹹，否則個湯會幾好；此外，牛肉唔多之餘，仲要係肥牛，我OK嘅，但老婆最唔鍾意係肥牛，黐住一截截肥膏，所以要扣分！而且，個人感覺，三文魚飯糰同個蕃茄牛肉湯唔係咁夾，蕃茄湯味濃，搶咗飯糰嘅三文魚味，肥牛又好似路過嘅街坊咁，只係好獨立出現咗係D湯度，所以，浸晌湯舊飯糰唔太好食，仲要飯糰本身結實嘅特性，浸一浸無埋！

自家制嫲嫲餃子 $34
嫲嫲餃子，真係麻麻，上交都講過寧願追加多隻糖心蛋好過叫依個餃子，一客6件，雖然唔點醬汁餡肉都夠味，但就如好普通嘅菜肉餃子，周圍都食到，唔需要嘥$34係度食啫。

因為二人枱真算細張吓，加上拉麵、蕃茄牛肉湯都大大個碗大大隻碟，我哋又叫咗唔少嘢，所以哩齊時堆滿枱，為咗影相又將D食物搬哩搬去，先發覺佢D碗碟原來好重，難為咗D侍應好似日日要舉啞鈴咁！

「燦都」逼近，都諗住個飯局搞唔成，點知個風無乜料到，話掛3號風球啦，風又唔大，連雨都唔多滴，所以飯局照舊！點知，勢估唔到，個風一走，個日晏晝先哩玩極速黑雨，短短幾個鐘，黃紅黑，5:30pm先哩掛黑色暴雨，搞到個舊同事飯局都唔知搞唔搞好，好彩當中仲有D有義氣嘅舊同事照出，咁就局照搞、飯照食，不過由大枱變細枱啫！

雖然得番5個人，但係熱情不減，哩到客家好棧，食套餐就最慳。二話不說唔使諗，就睇中四位用嘅自選套餐，有一個餐前小食，一個老火湯，4個餸（兩個固定，兩個自選），再加一個甜品，我哋無叫飯凈食餸都夠晒食呀！賣$348，免茶、免芥、免加一，每人$70就可以落樓，化算得很！

木瓜螺片煲豬骨老火湯

個套餐除咗揀足料老火湯，可以揀瑤柱海皇羮，或者加$100轉食個翅，但我哋梗係揀老火湯啦，廣東人幾時都咁鍾意飲老火湯，有無湯味，係咪真材實料，一飲就知嘛！依晚老火湯係木瓜螺片煲豬骨，跟埋湯渣另碟上，唔怕你驗明正身，一埕湯裝到7碗，絕對可以夠添飲。見佢D湯渣中螺片唔多，但豬骨就十足，所以湯味都算清甜，色澤濃郁唔會水汪汪，起碼唔係普通滾水例湯。

五香牛展

不錯嘅餐前小食，雖然叫小食，都算一大碟，成15塊之多整齊咁排列晌隻白方碟度，味道雖則不是驚為天日，但絕對算有水準，牛展切得厚薄適中，太厚易韌身唔好咬，太薄肉味唔夠實在，仲有，夠入味已經令個牛展好食！

碧綠淡水龍蝦球

簡單嘅一道小炒，以蜜糖豆、秀珍菇炒龍蝦球。主要食龍蝦球肉質嘅爽甜，所以覺得配蜜糖豆同秀珍菇幾夾，因為蜜糖豆同樣爽脆清甜，而兩者又屬於味淡嘅菜類，唔會太搶龍蝦肉味，故此嗒出龍蝦味。再者，你見個菜無獻汁就知師傅心意！

豉汁碎蒸魽魚皇

清蒸河鮮，當你睇個名會有少少奇怪感，何謂「碎蒸」，初時以為個「碎」字係形容D豆豉，條魚上枱後你就知何謂碎蒸喇，哈哈！有時去茶記食豬扒飯都會叫「碎上」，突然間醒唔起個做法，都係同出一徹啫。魽魚皇，唔好諗住係皇就大大條，我估本身都大條嘅，不過唔係原條上，只係以碎蒸手法上，即係斬開約兩隻手指大細嘅魽魚件哩豉汁蒸，依碟有成14件，而六人餐、八人餐相信就應該按比例大碟D！講番魽魚，清甜唔腥，肉質都幾嫩滑，豉汁蒸幾時都咁惹味，上面撒把蔥，惹味得哩有點清新感，所以唔好睇少D蔥，食麵食青真係好可惜架！

和味污糟雞

自選小菜之一，污糟雞好似源自順德，上網睇番資料應該以金針、雲耳、紅棗、榨菜、醬油哩烹調雞件，但今晚哩個和味污糟雞，似乎係簡單版喇，有雲耳，有紅棗，有榨菜，就唔見有金針，不過都無所謂，因為有時金針蒸嘢會酸酸哋，無咗仲好！隻雞唔肥，除咗咬落皮下脂肪少之外，因為蒸完碟面唔會見佢成層油，而雞肉嫩滑非常，又無唔熟情況。味道就側重咗紅棗味，所以食落棗味比較突出確係和味正氣。至於點解叫污糟雞，網上好幾個版本，唔知信邊個，我又唔係專家，故此無謂係度亂寫！

瑤柱鮮菌菜苗

自選小菜之二，咁多肉梗要揀番個全菜哩平衡吓，不過有少少揀錯，因為個龍蝦球已出現過秀珍菇，而依道菜又擺明係乜菌物菌，感覺有D重覆，而且話係菜苗，都只係生菜而矣，再加埋瑤柱絲，放上上湯，味道算係OK，係平淡D啫，當清清哋吸吓之前幾道菜嘅油份囉！

桂花糕

有少少失望，因為個餐牌寫住「精美糕點4位」，諗住4客糖水之類啦，點知果然真係糕點哩，桂花糕，不過就唔止4客喎，有5粒，可能見我哋有5個人就醒多一粒唔使讓哩讓去。糕身比較削，搵牙簽篤起佢好易慢慢斷成兩截，而且，桂花味又較為淡薄，整碗紅沙豆可能仲好D添！

晌度仲有唔同人數、唔同價錢嘅套餐，其實都好抵食，況且味道唔差，服務方面我就覺得OK喎，好似我哋去到，個侍應問我哋怕唔怕凍，怕就揀個無咁大冷氣位俾我哋；可能今晚因黑雨關係，唔算多客，頂到盡都係4乘滿，所以佢哋做嘢快手快腳，而叫菜時間，問佢哋今日個老火湯係乜，都好快答到，見我哋左度右度諗緊揀邊兩個自選菜式，又會俾吓意見、介紹吓其他，唔會好唔耐煩咁走咗去轉頭先再落單！環境方面都闊落，尤其今晚啦，係覺得佢哋D飯碗同瓷羮膠咗D，感覺低檔咗，同埋上菜用嘅碟，都係清一色白碟，唔會有咩花紋，唔知係咪想帶出佢哋做客家菜，同客家人一樣咁樸素呢？

 Yamm推出新的Sunday Brunch Buffet，緊係要黎試下。

不能錯過的是任飲的sparkling wine，味道很香也很易入口，可知不是每間酒店的brunch buffet都有sparkling wine提供，而且還是任飲。和sparkling wine最配的就是那裡一系列的cheese selection，居然有十多款！食過多間酒店buffet都未見過有咁多選擇。

有次走過飲品區時，經理還過來介紹以各種生果調制出不同味道的shooter，服務蠻貼心的，值得一讚。

之後就緊係唔放過自助餐回本之選，勁食生蠔、海鮮、刺身等，全部都幾新鮮，very good！加埋任飲汽酒同埋cheese，以呢個價錢黎講真係勁抵。

簡直食到一肚氣, 不會再幫襯呢間食肆全線的鋪頭嫁啦.

2010-7-26日是齋期, 我們去的是大自然素食太子分店, 服務員(其實係個黑衫的主管)為左多做一轉檯, 不停騷擾我們(當時桌上仲有大碟飯, 2碟每碟一半的餸, 同全部4份的甜品都未食). 咁o既服務態度, 飯堂都不如, 簡直香港食肆之恥!!!!

齋期人多,明白. 但我們咁勞氣, 係因為電話預訂檯時, 講明6點9 入檯, 食個半鐘的.
那 個黑衫黑面主管, 7點4-5個字(坐底9個字都冇), 就一臉善良的叫我地埋左張單先, 埋完單就變臉.
一陣就走過黎要收走我地的食物(未食完的), 話俾佢聽未食完, 仲要的, 佢無耐又黎收. 無耐第二個服務員又黎收.
仲離譜到企係我地張檯後面, 對空氣講「快d 俾番張檯」, 想同佢理論, 佢跟手就掉頭走.

食物質素無謂講了, 服務人員質素咁無品, 都唔會有下次的了.

$238一位再加一, 咁既價錢其實出面仲有好多選擇, 哩間都算垃圾之中既垃圾...

原因:
紫菜太soft, 壽司手卷全部有下塌情況出現, 個樣太醜...
海鮮粥本來都無問題, 但食落有d怪, 先發現加左牛油栗米囉, 有栗米都好正常, 但點解會有牛油味呢...再睇下個menu, 原來另外有款牛油栗米可以order, 咁大家都即刻明晒啦...咁都得!!
連茶都唔夠熱...
焗蠔仲激死, 極度唔新鮮, 仲要加埋d沙律醬同洋蔥等配料一齊焗, 個味超怪, 擺到明就係想用濃味遮掩住d死蠔味!!!
條青魚硬到可以打死狗, 夾極都夾唔開...
等得勁耐, 成三四個字都無野黎, 刺身又唔洗煮, 都唔明點解都要等咁耐!
入單次序勁亂, 一張單order10樣野就出得7樣, 數量又錯, 四人份量比得一人, 浪費時間去等.
我地5人但比張4人檯, 迫到死, lift口位都放三張檯, 廁所門口又放2張檯, 我想講經過都覺得臭, 仲點可以比客坐呀~~
18.30-8.30pm 但7.30就叫last order同要求埋單.
除左個支客有笑容之外, 全部都黑口黑面.

咁當中都有野可以讚下, 比返2分咁多...
原因:
牛舌同燒鰻魚夠熱, 好好味!
西瓜同燈都好甜, 雪米糍都夠硬. good.
羊胺都得既, 正常返少少.
刺身方便只覺得三文魚ok, 不過d蝦就真係夠大隻.
支豆好味

大家唔好唔記得, 哩度係蘭桂坊, 好食既, 我唔介意再比多d $, 去得蘭桂坊我都預左會貴, 但質素最少都要ok囉. 而家仲要差到咁, 真係連過海$都蝕埋!!!